আমাৰ বিভাগৰ প্ৰতি মোৰ কিছু মনৰ ভাৱ (আধুনিক ভাৰতীয় ভাষা আৰু সাহিত্য অধয়ন বিভাগ)
গুৱাহাটী বিশ্ববিদ্যালয়ৰ আধুনিক ভাৰতীয় ভাষা আৰু সাহিত্য অধ্যয়ন বিভাগত অধ্যয়ন কৰাৰ সুযোগ লাভ কৰি মই যথেষ্ট আনন্দিত অনুভৱ কৰোঁ। এই বিভাগটো কেৱল পাঠ্যপুথিৰ জ্ঞান লাভ কৰাৰ উপৰিও ভাষা, সাহিত্য, সংস্কৃতি আৰু সমাজক গভীৰভাৱে বুজিবলৈও আমাক উৎসাহ দিয়ে।মই বিশ্বাস কৰোঁ যে এখন শিক্ষানুষ্ঠান কেৱল জ্ঞান আহৰণৰ স্থানেই নহয়, ই পাৰস্পৰিক সন্মান, সহযোগিতা, সহানুভূতি আৰু সুস্থ সম্পৰ্ক গঢ়ি তোলাৰো এক গুৰুত্বপূৰ্ণ স্থান।
বিভাগৰ শিক্ষক-শিক্ষয়িত্ৰীসকলৰ প্ৰতি মোৰ বিশেষ শ্ৰদ্ধা আছে। তেওঁলোকৰ পাঠদানৰ জৰিয়তে কেৱল বিষয়বস্তু বুজুৱাই নহয়,সাহিত্যক কেনেদৰে বিশ্লেষণ কৰিব লাগে আৰু নিজৰ চিন্তা-ভাৱনা কেনেদৰে প্ৰকাশ কৰিব লাগে সেই বিষয়েও আমাক উৎসাহিত কৰে। তেওঁলোকৰ জ্ঞান, অভিজ্ঞতা আৰু সহায়-সহযোগিতাই আমাৰ শিক্ষাজীৱনক গুৰুতৰ ভাৱে প্ৰভাৱ পেলোৱা দেখিবলৈ পোৱা যায়।
এই বিভাগৰ পৰিৱেশ মোৰ বাবে অতি শিক্ষণীয় আৰু অনুপ্ৰেৰণাদায়ক। বিভিন্ন ভাষা আৰু সাহিত্যৰ অধ্যয়নৰ জৰিয়তে ভাৰতৰ বৈচিত্ৰ্য, সংস্কৃতি আৰু মানুহৰ জীৱনক নতুন দৃষ্টিভংগীৰে চাবলৈ শিকিছোঁ। সহপাঠীসকলৰ সৈতে আলোচনা, মত-বিনিময় আৰু বিভিন্ন কাৰ্যসূচীত অংশগ্ৰহণ কৰিও বহু নতুন কথা শিকিব পাৰিছোঁ।
এখন সুন্দৰ বিভাগৰ পৰিচয় কেৱল ইয়াৰ শৈক্ষিক সফলতাই নহয়, ইয়াৰ সৈতে জড়িত মানুহখিনিৰ মানৱীয়তা আৰু পাৰস্পৰিক সম্পৰ্কইও নিৰ্ধাৰণ কৰে।জ্ঞান মানুহক শিক্ষিত কৰে, কিন্তু নম্ৰতা, সহানুভূতি আৰু পাৰস্পৰিক সন্মানেহে মানুহক প্ৰকৃত অৰ্থত মহান কৰি তোলে। মই আশা কৰোঁ, আমাৰ বিভাগটো জ্ঞানৰ লগতে এই মূল্যবোধসমূহৰো এক সুন্দৰ প্ৰতিফলন হৈ ৰ'ব।মিলাপ্ৰীতি কেৱল কথাত নহয়, আচৰণত প্ৰকাশ পায়; সন্মান কেৱল জ্যেষ্ঠতাৰ বাবে নহয়, প্ৰতিজন ব্যক্তিৰ বাবে থাকে; আৰু একতা কেৱল একেলগে থকাৰ মাজতে নহয়, ইজনে সিজনক বুজি পোৱাৰ মাজেৰেও প্ৰতিফলিত হয়।সকলোৰে অৱস্থা আৰু অনুভৱক সমান গুৰুত্ব দিয়া এক গুৰুত্বপূৰ্ণ স্থান বুলি মই ভাবোঁ।
শেষত মোৰ বাবে এই বিভাগটো জ্ঞান, চিন্তা আৰু সৃষ্টিশীলতাৰ এক সুন্দৰ মিলনস্থলী। আগন্তুক দিনবোৰতো এই বিভাগৰ পৰা লাভ কৰা জ্ঞান আৰু অভিজ্ঞতাই মোৰ ব্যক্তিগত আৰু শৈক্ষিক জীৱনত বিশেষভাৱে ভূমিকা পালন কৰিব বুলি মই আশা কৰোঁ। গুৱাহাটী বিশ্ববিদ্যালয়ৰ আধুনিক ভাৰতীয় ভাষা আৰু সাহিত্য অধ্যয়ন বিভাগৰ প্ৰতি মোৰ শ্ৰদ্ধা অক্ষুণ্ণ ।
